ست بتحكي
انت في الصفحة 1 من صفحتين
البوست اعتقد كل كلمة فيه بتعبر عن حال أغلب الامهات اللى بيبقي اولوياتهم الزوج والاولاد وبعد كده اى حاجة بتكفيها والنتيجة انها بتبقي بالنسبة لهم بترضي بأي شىء وده طبعا مع الوقت والتقدم فى العمر بيأثر عليها لكن بيكون فات الأوان لانهم اتعودوا على كده👇
سيدة بتحكي بتقول
من فترة مش طويلة كان مستحيل أعمل أكلة أنا بس في البيت اللي بحبها، أصل هقف وأتعب وفي الآخر أنا بس اللي هاكلها..
لحد مافي يوم بنتي ماكانتش خلصت أكلها وجابتلي الطبق قالتلى : خدي كمليه مش قادرة أخلصه.
بقولها: بس انتي اللي قلتي عايزاه!
قالتلي: آه، كنت فاكره هخلصه، بس مقدرتش، وعاملة حسابي إنك هتاكلي ال الليفت أوڤر( البواقي يعني)
بسألها: طب انتي متديش البواقي لبابا ليه؟
لقيتها بتقولي: عشان الليفت أوڤر للأم بس!
الصراحة كلامها ضايقني و خبط في موقف كان حصل مع صديقة ليا، راجعة بولادها من النادي وركنت قدام السوبر ماركت
قالتلهم : انزلو هاتولنا كلنا أيس كريم
نزلو ورجعو جايبين ليهم كلهم وبيدوها الفلوس الباقية!
بتسألهم: طب فين بتاعي؟
راحت بنتها سألتها: هو انتي عايزة انتي كمان؟
قالتلها: اه انزلي اشتريلي.
وقتها كان الايس كريم ب ١٠ جنيه البنت نزلت ورجعت جايبالها علبة صغيرة مش شبه الأيس كريم بتاعهم فصديقتي بتسأل: هو ده بكام؟
البنت قالتلها : بتاعك ب ٣ جنيه.
صديقتي : طب ليه ماجبتوليش زيكم؟
قالتلها: معرفش انك عايزة زينا، انتي علي طول بتنقي لنفسك أصغر حاجة.
