حارس المقبره

حسيت اني اتشليت فجأة والاكل وقف في زوري لما استعدت في مخي كلمة المقپرة وبصتله وانا مبلم وقولتله ..
انت قولت مقپرة 
أهيه امال انا بحكي في ايه من الصبح 
مقپرة ازاي ياهمام مقپرة اللي في مخي ولا حاجة تانيه
هي المقپرة حاجة واحدة هو في غيرها بس دي مش اي مقپرة
نهارك ابوك مش فايت انت بتاكلني عشان تنزلني مقپرة هتدفني بالحيا يالوح
ارحمني يارب من غباء عثمان اللي هيجيب اجلي بدري ھدفنك ازاي احنا هننزل عشان نعيش زي باقى الناس ماهي عايشه
هننزل مقپرة عشان نعيش انت رجعت تشد كوله تاني ياولا 
لا حول ولا قوة الا بالله انا عمرى ماشديت كوله وفتح مخك معايا شوية
هي دي فيها تفتيح مخ هو احنا نازلين للجنة
بالظبط الله يفتح عليك هي جنة ومش اي جنة فيها دهب ومرجان وياقوت وقرنفل وتماثيل فرعونية واصنام ياما
استغفر ربك يابغل هتشرك بالله ياهمام
هشرك بالله ازاي بس الحاجات دي ياعثمان كنوز وبتتباع بالوفات كتير بالعملة الاجنبي
ومين اللي بيشتريها ياناصح شوية اصنام هتبيعهم لاهل قريش
منا بقولك وفي دهب وياقوت ومرجان
ايوه صح وقرنفل 
قرنفل ! هو القرنفل بقى كنز هو سعره وصل كام دلوقت
كتير اوي ياعثمان كنز بقولك
طب وانا دوري ايه في الحكاية المهببة دي هقف بيهم في السوق ادلل عليهم
اسمعني وهتفهم مع اني حكيت وانت مافهمتش
انا سيبت الاكل وبسمعك اهو وخد بالك الاكله دي مش محسوبة
هاكلك وهروقك وهخليك اغنى من عمدة البلد بس ركز معايا وده يبقى سر بيني وبينك
ماتنطق اخلص من غير مقدمات
انا لاقيت مقپرة فرعونية فيها كنوز زي ماقولتلك بس محتاجين نفتحها وندخلها وناخد كل اللي فيها
هو انت ماتعرفش اللي فيها وعمال تقولي فيها كنوز عرفت منين بحكاية الكنوز دي وهي مقفوله ياقفل
ماهي اي مقپرة فرعوني فيها كنوز ياعثمان انت ماسمعتش قبل كده عن المقاپر الفرعونيه
بلاش سيرة المقاپر دي جتتي بتتلبش خلاص خلينا في المهم