انا دكتورة صيدلانيه
انت في الصفحة 1 من 3 صفحات
انا دكتورة صيدلانية عايشة في شقة مع بنتي لوحدنا..بعد سفر زوجي للخارج..ملك بنتي عمرها 6 سنين
هي أجمل حاجة في حياتي هي أصلا كل حياتي
بنزل الشغل كل يوم الصبح واخدها معايا الحضانه
ولما ارجع أعدي عليها واخدها ونروح
عندي الصيدلية بتاعتي تحت البيت بنزل أقعد فيها من بعد العصر لغاية الساعه 11 بالليل
عند الجيران..راجل وست طيبين
كبار في السن ربنا ما رزقهمش بأطفال
والست أميمة جارتي بتفرح أوي لما أسيب ملك
عندهم..وساعات لما اطلع بالليل
والاقيها نامت عندهم..جارتي تقولي خليها نايمه
وكمان لو قلقت بالليل ومكنتش جنبها ممكن تتخض
الحقيقة كانوا ناس ودودين جدا جدا
هما جيرانا من وقت ما سكنا في العمارة من 4 سنين
ناس طيبين جدا وعمري ما شوفت منهم الا كل خير
والحقيقة شايلين عني هم اني أسيب ملك لوحدها في الشقه
جوزي بيتصل بيا كل يوم يطمن عليا وعلى ملوكه
بقوله اننا بخير الحمدلله
طب وشغلك والصيدلية
كله بخير متقلقش
المهم انت عامل ايه في شغلك
الحمدلله كله تمام مش ناقصني غير وجودكم جنبي
دا انا بعدهم باليوم والساعه
ربنا يحفظك وترجع لنا بألف سلامه
الامور كانت ماشية بشكل طبيعي..من البيت للشغل
للحضانه للبيت والصيدلية
انا وملك وجارتي أميمة وجوزها الأستاذ حسن
أهلي عايشين بعيد بطمن عليهم وبيطمنوا عليا من وقت للتاني
في يوم صحيت على خبر ضايقني
جيرانا مسافرين يصيفوا وهيغيبوا
أسبوعين تلاته..انا مبسوطه انهم هيغيروا جو
لانهم تقريبا مش بشوفهم بيخرجوا الا للضروره
بس هما كانوا بياخدوا بالهم من ملك
وانا بكون مطمنه وهي عندهم..وانا في الصيدليه
او لو عندي مشوار مينفعش اخدها معايا فيه
بعد اسبوعين رجعوا تاني..وكانوا مشتاقين لملك جدا
وهي كمان كانت مفتقداهم..بيعاملوها زي ماتكون بنتهم
لدرجة اني ساعات كنت بغير على ملك منهم
بعد يومين من رجوعهم..روحت اخدت ملك
من مدام اميمه بعد ما خلصت شغل وطلعت فوق
بعد ما دخلنا شقتنا وكنت بنيم ملك
لقيتها ماسكه دبدوب صغير
قولتها طنط أميمه أدتهولك يا روحي
لأ يا مامي دا ميدو
